Na vaaia i le vaiaso talu ai i latou e lagolagoina le itupa o tamaitai ma lo latou puipuiga, i luma ane o le Maota o le Palemene e faailoga ai se tasi o vaega tāua o le latou finau e faatatau i le sauaina o tagata aemaise lava le itupa o tamaitai i nofoaga e pei foi o nofoaga faigaluega.
Sa vaaia le tuuina o fualaau o le tulipe poo tulips e faamanatu ai soifua ua ma’umau ona o aafiaga o sauaga i aiga ma soo se nofoaga, ae o totonu o le Palemene na tutulai ona sui e patipatia ma faailoa le amana’iaina o le folasia o le vaega o le tulafono mo le totogiina o le 10 aso o livi mo i latou e aafia i sauaga i totonu o aiga.
Fai mai o se taumafaiga na amatamea ai le Australian Services Union i le latou campaign ua faaigoaina “We Won’t Wait”, ma o le finau ina ia tuuina le tulaga lea o livi e agavaa ai i latou e aafia i sauaga, i totonu o le National Employment Standards.
Faailoa e le failautusi o le iuni o tagata faigaluega, Natalie Lang e mana’omia le fesoasoani lea aemaise mo tamaiti e faigata ona sosola ese mai ni mafutaga e lē saogalemu. Fai mai a latou o se laasaga tele lea i le agai i luma ae mana’omia ona faaauau pea e aua le tuua.
