Ua faamauina le faatupula’ia o le to’atele o tagata ua aga’i e tala mai i tua a latou KiwiSaver, ma ua faamaonia o le masina o Mati, lea ua ta’ua ai le maualuga tele o lea numera.
E oo atu lava i le 225 miliona na tala i tua i le masina o Mati, ma o se numera tele lea pe a faatusatusa atu i isi masina ua mavae.
Na ta’ua i lipoti mai le Ofisa o Tupe Maua poo le IRD, o loo nafa ma le mata’itūina o KiwiSaver a tagata lautele, i faamaumauga e 9,170 tagata fai saofaga o le KiwiSaver ua tala i tua a latou seleni, e pei ona maua ai le aofa’iga e $225,483,431.
Ae i le faavasegaina o itu ma mafua’aga ua tala ai i tua seleni, e ta’ua o le 4,190 o tagata na alu ai le $181.1 miliona ona o le faatauina o fale, ae o le 4,980 o tagata na alu ai i tua le $44.3 miliona ona o tulaga faigatā ua iai nei le soifuaga (hardship).
Mai i nei faamaumauga ua māua ai, e 32 miliona ua sili ai le aofa’iga o tupe ua tala mo fale faatau o le masina o Mati pe a faatusatusa atu i le masina o Fepuari o le tausaga lenei, ae 7.3 miliona le tupe faasili o le aofa’iga o seleni tala i tua o KiwiSaver a le mamalu o le atunuu ona o tulaga ma’ale’ale ma le faigatā ua fetaia’i ma i latou.
Mo le silafia o lenei auaunaga o le KiwiSaver, sa mua’i faia e le vaega faaupufai a le Labour i le tausaga e 2007, e fesoasoani i tagatānuu Niu Sila e teu ai seleni auā taimi e mālōlō litaea ai mai galuega sa tautua ai, ae ua faafaigofieina foi le mafai ai ona vave tala mai i tua le seleni mo le faatauina o se fale mo le ulua’i taimi, ma le feagai ai ma taimi faigatā o le soifuaga.
Puna o Faamatalaga: https://www.interest.co.nz/personal-finance/133053/kiwisaver-early-withdrawals-reached-record-monthly-high-march-more-savers
