O loo faaauau galuega māta’itū a le Ofisa o le Vaaitau i timuga mamafa mo Northland, o isi o itu o Aukilani ma Coromandel Peninsula, a o aga’i malosi mai peau susū o savili mai Sasa’e.
Faamauina i lipoti mai le 1News, e amata ona māta’itūina e le auaunaga itu o Northland mai le 6 i le afiafi o le Aso Gafua e aga’i atu i le aoauli o le Aso Lua, a o Aukilani i Mātū o Harbour Bridge, Great Barrier Island ma Coromandel o loo faatulaga le amata māta’itūina mai le tulua o po ma ao.
Māua le ono iai o ni faititili ma uila e emo mo se taimi, ma e ono faaauau atu ona iai o timuga mamafa i le aga’i atu i le ogatotonu o lenei vaiaso.
E tele faaitu e pei ona lipotia mai le pagātia ona o uiga loulouā o le tau, ma o loo faamauina le tapunia pea o auala o State Highway 2 e aga’i atu lea i faaitu o le Waioweka Gorge ma e ono tapunia pea mo le tele o vaiaso, talu le tele o eleele solo na tula’i mai ina ua totō timuga e oo atu lea i le 300 milimita le tetele o le suavai timu na maua mai ai.
Ma ona o ia tulaga o lea na molimauina ai le aga’i atu o vaalele lavea’i o helikopa e fesoasoani i le lavea’iina mai o tagata talu ai ua lē saogalemū auala po ua tapunia.
Puna o Faamatalaga: https://www.1news.co.nz/2026/01/19/more-heavy-rain-on-the-way-for-upper-north-island/
