Ua faatumau e le faamasinoga o talosaga toe iloilo poo le Faamasinoga Apili a le Faamasinoga Maualuga a Samoa, le i’uga a le Faamasinoga Sili a le atunuu na fofogaina ia Iulai o le tausaga e 2024, na faalēaogā ai le finauga faaletulafono poo se su na faaulu e lē sa avea ma Loia Sili a le malo na lu’i ai le faai’uga a le Palemia i lena taimi le afioga Fiame Naomi Mataafa, na faamuta ai le tofiga Loia Sili sa tauave e le afioga Savalenoa Mareva Betham Annandale.
I le su’esu’eina o le apili na faia i le masina o Novema o le tausaga na te’a nei, o le Aso Faraile ua mavae na faailoa ai le faai’uga a le laulau e to’atolu o lea faamasinoga ua faatumau ai le i’uga ua faalēaogā ai le su i ona vaega uma.
Ua faatumau e le faamasinoga o talosaga apili vaega uma na faavae ai le faai’uga.
Sa talosaga lē sa avea ma Loia Sili a le malo i le faamasinoga o talosaga e toe faia se iloiloga faaletulafono poo se judiciary review i nisi o vaega o le faai’uga a le Faamasinoga Sili ona o le finauga e iai vaega o le tulafono sa lē atoatoa ona su’esu’eina, e faasino i tusi e lua mai le Palemia talu ai sa faamālōlō lē tumau ai lē sa Loia Sili ma le tusi na faamuta ai le tofiga.
E 650 afe tālā sa finauina i le tagi autū e tatau ona totogi e le malo ona o le solitulafono o le faai’uga na faamuta ai le tofiga Loia Sili o Savalenoa peita’i o le teena ai o le talosaga apili ua faatonuina ai le itu tagi e totogi le lima afe tālā i le itu na molia i le finauga.
E lima afe foi le isi tupe na faatonu le itu talosaga e totogi i le itu na faasaga iai le su ina ua aumai le faai’uga a le Faamasinoga Maualuga i le silia ai nei ma le tausaga talu ai.
