Tusia: Maina Vai
Ua faatulaga le apili faasaga i le faaiuga a le Faamasinoga i le alii leoleo Satini ia Khamtahn Stanley.
O ananafi i tolauluga a le Faamasinoga Mauluga na maua ai le tuuina atu o le apili a le a le ofisa o le loia sili e pei ona tulai ai le Alii Loia ia Shane Wulf e suitulaga ia Leinafo Taimalelagi lea ua faase’e atu iai na te tauavea le itu a le Loia Sili.
Ua faia lea tulaga ona o le latalata tele o le sootaga o le alii satini i le ofisa o le Loia Sili aua o ia sa ave ma se tasi na te tauaveina le itu a leoleo i mataupu i le faamasinoga, o lona sootaga i lea taimi ma le ofisa o le Loia Sili e silia i le 10 tausaga o galue ai.
O loo tulai Aumua Ming Leung Wai mo Stanley, ma na faailoa ua maea ona tuuina atu uma pepa ma faasilasilaga o le apili i itu nei mo le silafia, peitai sa talosaga le alii loia ia Shane Wulf mo se vaiaso se tasi e tolopo ai le iloiloga o lenei apili sei ia faamautu mai la latou itu.
O lea na tuuina atu ai loa e toe fofoga i le aso 21 o le maisna nei lava i le Faamasinoga Maualuga e iloa ai le isi laasaga.
O le alii o Stanley sa molia faatasi mai ma Ulugia Lomalasi i le Faamasinoga Maualuga i le 2019 i le moliaga o le fasioti tagata paivalea ina ua maliu se alii talavou 20 tausaga le matua e faapea sa faaoolima iai.
E lei leva nei ona tuuina mai le faaiuga a le Faamasinoga maualalo e sala tupe i laua ia, o le taimi nei ua toe fo’i atu le alii Satini e faigaluega i le Matagaluega o leoleo i le vaega o le General Policing ina ua mautinoa e saoloto e aunoa ma se faasalaga faafalepuipui.
O le uluai amata mai o le mataupu lenei na tauaveina ai ele Afioga Taulapapa Brenda Heather Latu le itu a leoleo, sa tulai Taulapapa ina ua tuuina atu ia Aperila o le 2021 le talosaga mo se Faamasino e toatasi e faia le iloiloga, peitai o le tau faaiuiu ai o le 2021 ina ua toe valaau ia Novema lenei mataupu na tulai ai loa le tamaitai loia ia Leinafo Taimalelagi, o le taimi tonu loa lea na se’e mai ai loa mai le moliaga o le fasioti tagata pa’ivalea i le moliaga o le faaoolima, ma tuuina atu ai loa le mataupu e tolaulau i lalo i le Faamasinoga Faaitumalo.
O le faaiuga a le faamasinoga na tuuina mai lea ua toe agai ai le Ofisa o le Loia Sili e apili.
O le a toe fofoga lenei mataupu i le vaiaso oi tua atu o le vaiaso fou i le Faamasinoga Maualuga a Samoa i Mulinuu.
