Ua taoto faatafa nei le vaa fagota o se kamupani faifaiva mai fafo ua pa’ulia i se vaega o le gataifale o le taulaga i Apia, ma ua mautinoa o le a tele se galuega e faia e aveesea ai ma lumafale o le laumua o le atunuu.
Ua faailoa i se finagalo o le minisita o galuega tetele, fela’ua’iga ma pulega o uafu ma taulaga le tofa Olo Afoa Fiti Vaai, i le Savali le nusipepa a le malo, ua ia faatonuina le faia o se taofiga faaletulafono poo se stop order, ina ia lē mafai ona aveesea atu le vaa ma o tatou ogasami a o lei mae’a suesuega i ni aafiaga o le tatou gataifale ma le siosiomaga mai le faaletonu ua aliali mai.
O se kamupani faifaiva i Vanuatu o loo lesitala ai lea vaa fagota, ma ua faailoa e le minisita ua oo atu se logo ia te ia, ua faaalia ai o le faatamala o le kapetenei ma le auvaa i le saunia lelei o taula o le vaa a o tuta ai i le uafu i Apia, na mafua ai ona tupu le faaletonu.
O le aafia o le sami i ni faaletonu tau suauu masaa mai le vaa fagota o se tasi lea o vaega tāua o le a agai iai suesuega.
E iai ni faasalaga tupe e fetaiai ma le kamupani e ana le vaa pe a mae’a ia sailiiliga.
