E lima tausaga le umi o le fuafuaga mo le faafoeina ma le pulea o le Pulega o oloa auina atu i fafo a Samoa, lea ua faalauiloa aloa’ia i le tatalaina o le ofisa fou o lea pulega tuma’oti a le malo.

E lē gata ina faalauiloa e le ta’ita’i o le malo lea fuafuaga o ta’iala ae ua faamautū ai foi ma sui o le komiti faatonu o le pulega ua faamaonia i se faai’uga a le Kapeneta.

Ua filifiliai se tasi o tamalii faipisinisi i le atunuu e avea ma ta’ita’ifono o le afioga Tuia’opo Andrew Ah Liki, a o sui o le Komiti Faatonu ua filifilia iai le afioga Tuimaseve Kuinimeri Asora Finau, afioga Peseta Peter Tone, afioga Tagaloa Eddie Wilson ma le afioga Vaai Kolone Vaai.