O lagona tiga ma faitioga mai nisi o le pasese o le malaga mulimuli mai Savaii a le vaa la’upasese o le Samoa Express ua agiga i luga o upega tafailagi, e mafua i le lē tausisia e le vaa o le taimi sa tatau ona alu ese o le 4 i le afiafi o le Aso Faraile na tea nei, ua faatoese ai le Minisita o le faalapotopotoga o vaa le tofa Olo Fiti Afoa Vaai, ma ia faailoa i se pepa o faamatalaga faalauaitele, e le toe tupu lea faaletonu i le lumanai.
Na tuai ona alu ese le vaa ma lana pasese faapea uta ma taavale, ona o le tuai ane o le aumalaga e silia i le toa selau o tagata tafafao mai Saina lea na taunuu i le Aso Sa ua mavae, faapea foi ona tuai taunuu ane ma nisi o le au mautofi i le Malo e pei o Minisita sa malaga i Savaii i le Aso Faraile e molimauina le uluai seleselega a le itumalo o Palauli 2 faapea ona maimoa ma tafafao ai ia tulisi mai Saina i le motu o Savaii.
Ua ta’ua e se tasi o le pasese i upega tafailagi, na faatoa alu ese le vaa i le lata i le fitu i le afiafi ae taunuu i Mulifanua ua lata i le 9 i le po.
O atugaluga o lea pasese ona ua le toe feoai ni pasi la’upasese i lea taimi, ae utiuti foi avanoa o isi auala o feoaiga e pei o taavale laiti poo taxi, seia vagana tagata e iai taavale sa sologa lelei le malaga mai ma agai i nuu ma afioaga e ui ua tuai ona taunuu le vaa i le taimi masani o loo feoai pasi ma isi taavale e maua ai se auala.
Ua faailoa e le Minisita o le faalapotopotoga o vaa, e poto le tautai ae le atoa i’a o lona faiva, ma ua lē ‘alo lava i le ataata o le laau ona o le upu moni ua lape se auaunaga i le pulega ma ia o le minisita ona sa lē tatau ona tulai mai lea tulaga.
Ua faamaualalo ai le minisita ia i latou uma na aafia aemaise o le atunuu, ua avea ai o ia ma sui o le pulega o vaa faapea le faigamalo e faamagalo se auaunaga ua lape.
