O lologa ma tafega sa aafia ai nisi o vaega o le motu tele i Salafai sa avea lea ma faataitaiga o le polokalame a le Matagaluega o Siosiomaga e tauala atu i le Ofisa o Faalavelave Faafuasei i le afioga o Lelepa.
O le sini autu o lenei polokalame o le faatupulaia o le nofo silafia ai e le mamalu o nuu ma afioaga i aga ma faatinoga e tali atu ai i taimi o faalavelave faalenatura.
O le mataituina ai o le sao o nuu ma afioaga i lenei faamoemoe ina ia malupuipuia le mamalu o le atunuu i soo se taimi e tutupu mai ai faalavelave faalenatura.
O nisi o matagaluega a le Malo ma faalapotopotoga tuma’oti e aofia ai le Matagaluega o Leoleo, Soifua Maloloina, Faatāua le Ola ma le Nuanua o le Alofa o loo vaavaalua ai ma le Siosiomaga e faatino lenei polokalame.
O loo unaia malosi ai le galulue faatasi o vaega taitasi i totonu o afioaga seia oo lava i fanau aoga ina ia aoaoina vaega tāua o lenei polokalame auā le nofo sauni ai i soo se taimi e lofia ai le atunuu i faalavelave faalenatura.
Ua mae’a faatino foi lenei polokalame i nisi o afioga i Upolu.
