E lē o toe mamao ae taunuu le vaa o loo aumai ai masini ma isi mea faigaluega e aveese ai suāuu mai le manuao o le Manawanui o loo goto i gataifale i Saute o le motu o Upolu.
Ua faailoa lea tulaga e le Matagaluega o Galuega Tetele ma Fela’ua’iga a le malo, o lona Ofisa Sili o pulega o loo ta’ita’ifono i le komiti a le malo e feagai ma galuega lavea’i pe a iai ni aafiaga o le gataifale o Samoa i ni suāuu masaa.
O le mae’a o le feiloa’iga lona tolu a lea komiti ma afio’aga o Safata o loo aafia gataifale na faailoa ai le avea o lea feiloa’iga e faailoa ai tulaga o loo faagasolo ai le galuega.
Na faailoa ai foi le taunuuga o su’esu’ega sa faatino e le nofoaga o su’esu’ega faasaienisi le SROS.
Ua faailoa i se pepa o faasalalauga o loo faaauau pea ona mata’itū e le komiti tulaga o loo faatino ai galuega mo le aveesea o suāuu mai le manuao.
O le faai’uga o le vaiaso na te’a nei i le Aso Toonai na faia ai se sauniga i se vaega o le ogasami o loo goto ai le vaa o le Manawanui, ma o se sauniga e tusa o tu ma aganuu a tagata Maori o Niu Sila e faatino a o le’i faia se galuega e pei ona o le a feagai ma le kamupani o le a aveesea suāuu mai lea manuao o le fitafita o le sami a le malo o Niu Sila.
O loo faaauau pea ona tapu le fagotaina o le gataifale o nuu o Safata o loo aafia e pei ona iai se faasalalauga mai le Minisita o Galuega Tetele ma Fela’ua’iga i le aso 8 o Oketopa.
