Ua faamauina le faateteleina o le malosi o le afā o Vaianu i le Pasefika, ma ua faailo i faamaumauga mai le vaaitau le āfatia ai o Niu Sila i lea afā i le aga’i atu i le faai’uga o le vaiaso, a o vaaia ai le malolosi mai o matagi ma timuga mamafa.
Lipotia mai le NZ Herald le silia ma le 6 lapata’iga ma tulaga o galuega māta’itū a le ofisa o le vaaitau mo le North Island ma itu pito i luga o le South Island i le aga’i atu i le ogatotonu o le vaiaso, e ese mai i tulaga māta’itū o le afā e pei ona faamauina le āfatia ai o Aukilani ma le North Island i le faai’uga o le vaiaso.
Ta’ua e le MetService e lua ni matagi malolosi poo ni afā o loo taamilomilo nei i itu o le Pasefika, ma na faamanino mai e le sooupu ia Heather Keats o le asō o loo molimauina ai le iai o le afā o Vaianu i itu i Mātū i Sisifo o Fiti ma e mautinoa le āfatia o le North Island.
Faailo e Heather Keats, e iai le tulaga e ono suia mai le Vaega 2 poo le Category 2 le afā e aga’i atu i le Vaega 3 poo le Category 3 i se taimi o le aoauli nei.
Faaopoopo foi Heather, e fai sina telē o aafiaga o lenei afā ia Niu Sila i le vaavaai atu i le tulaga o loo iai.
Ae na ia ta’ua a oo mai ia Niu Sila, o loo valo’ia le iai i le Vaega 2 poo le Category 2 peita’i e lē o mailoa tonu le ono faatumauina pe aga’i i luga.
I ripoti mai le taeao, o le afā o Vaianu o loo faamauina o le 600 kilomita i Mātū i Sisifo o Nadi i Fiti, ma i faamaumauga o loo māta’itūina lava le ala o loo aga’i iai peita’i i le taimi nei o loo aga’i sa’o mai lava i le atunuu.
Faamauina o le a aumaia e le afā ni matagi malolosi, e tō faata’uta’u ma timuga mamafa.
Ae o le isi o afā, o Maila o loo i le Vaega 3 poo le Category 3 o loo aga’i mālie atu i itu o le Atu Solomona, ma e faaalia e le MetServices e lē aafia ai Niu Sila i lea matagi.
Puna o Faamatalaga: https://www.nzherald.co.nz/nz/northland-orange-warning-as-heavy-rain-spreads-across-upper-north-island/HQ3ZCOLCQJBKNOGI4KE5DF2XQ4/
