O le taeao nei na faatautoina ai sui faipule tamaitai faaopoopo e toatolu o le paeaiga lenei lona 17 o le Palemene a Samoa, ina ua toe usuia le fonoaoao a le Palemene i le asō, 17 Me 2022.
O le Afioga Aliimalemanu Moti Momoemausu Alofa Tuu’au (Alataua i Sisifo), Afioga Faagasealii Sapoa Feagia’i (Aleipata Itupa i Lalo), ma le Afioga Toomata Norah Leota Siaki (Anoama’a 2). O sui tamaitai faaopoopo nei ua tulai mai e faaatoaina le 10 pasene o faipule tamaitai e tatau ona iai i le Palemene aemaise ai foi le faamalieina o nisi vaega o le tulafono faavae e faasino lava i lenei mataupu o le sailia o le 10% o tamaitai.
O le faaopoopo ai o sui tamaitai nei e to’atolu ua tulai mai ai le aofaiga o sui usufono o le Palemene i le 53 mo le taimi nei, a o faatalitali ai le iuga o le faigapalota laititi a le itumalo Gagaifomauga Numera 2 lea o le a faataunuu i le aso 3 Iuni 2022, e sailia ai se tasi e suia le afioga i le alii faipule na tuumalo i le masina o Mati, le Afioga Va’ele Pa’iaaua Iona Sekuini.
Ma ua tulai mai foi le ta’itoalua o sui faipule i nisi o itumalo faapalota e tolu e aofia ai Alataua i Sisifo (Seuula Ioane ma Aliimalemanu Momoemausu Alofa Tuu’au), Aleipa Itupa i Lalo (Faleomavaega Fuimaono Titimaea Tafua ma Faagasealii Sapoa Feagia’i), ma Anoamaa 2 (Lauofo Fonotoe Nuafesili Pierre Lauofo ma Toomata Norah Leota Siaki).
all photos: I le mae’a ai o le fono a le Palemene i le taeao nei na faatauto ai sui tamaitai faaopoopo o le Palemene
