O le motu o Savaii ua amata mai ai polokalame a le Matagaluega o A’oga ma Aganu’u ua faataua ai i lenei vaiaso atoa i totonu o a’oga uma i le atunuu le faatāua o le tatou gagana ma a tatou aganu’u.
O se taimi muamua e pei ona faailoa e le Minisita o Aoga ma Aganuu ua faatino ai lea faamoemoe o le malo e ala i lana Matagaluega ua faatāua faatasi le tatou gagana ma a tatou aganu’u.
O le Kolisi Maualuga i Asau sa amata ai lea polokalame i le aso Gafua lea sa auai ai le ofisa sili o le Matagaluega o Aoga ma Aganu’u, o sui o le Komisi o le Gagana Samoa, faapea le faatonu o Aoaoga o le Gagana tu ma Aganu’u i le Iunivesite Aoao o Samoa, ae sa molimauina e fanau aoga o le vasega 12 a le kolisi o Asau faapea fanau o le vasega tausaga 8 a le Aoga Tulagalua a lea afioaga i Salafai.
E pei ona silafia o le lua vaiaso ua mavae i taualumaga a le Palemene e toatele sa molimauina ai nisi o saunoaga ua malolosi upu o le gagana sa faaaoga ai, ma o le tāua lea o lenei vaiaso i fanau a le atunuu ia aoaoina ma faasino iai upu faaaloalo o le tatou gagana e tautatala iai, ae le o le tosina i saunoaga e masua mai ai upu malolosi ua le faaaloalo.
O le Aso Lua o lenei vaiaso ua toe a’e uma ai aoga i le atunuu ona sa tapunia i le Aso Gafua ona lapataiga ma fautuaga o uiga louloua o le tau sa aafia ai le motu o Upolu i le Aso Sa.
