O loo faatalia se isi lipoti lata mai i le mataupu na lipotia i le aso ananafi ua feta’ua’ina ai le faaoolima o se faiaoga i se tamaititi aoga i se aoga i Niu Sa Uelese ina ua tulai mai se vevesi i le va o le toalua lea i se potu aoga.
Fai mai leoleo o le vevesi na tulai mai i le Maitland Grossman High School ma sa pueina e se tasi o tamaititi aoga le vevesi lea ma ua alu i luga o upega tafailagi ia ata.
Fai mai ua molia le faiaoga i le taimi nei ma o ata o loo vaaia ai le toso ane i lalo e le faiaoga o le tamaititi aoga i se kesi ae vaaia foi le tamaititi aoga o togi ane se laulau i le faiaoga.
Fai mai na siaki e paramedics le tamaititi na aafia ma e le o manua ae fai mai leoleo o le a faaaoga ata ia i le suesuega ma o loo tālia ai se isi lipoti.
