O le falemaliu o le maota gasegase o Tupua Tamasese Meaole i Motootua o loo taoto ai le tino maliu o le tama’ita’i tusitala ma fatuolo o Papalii Sia Figiel e faatali ai le taunuuga o su’esu’ega a foma’i ma leoleo e faamautū ai le māfua’aga o le maliu.
O le taeao o le Aso Gafua i le 15 minute e te’a ai le 6 e pei ona faailoa mai e le Sui Komesina o leoleo, falepuipui ma le toe fuata’ina afioga Leiataualesa Samuelu Afamasaga na maua atu ai Papalii Sia ua maliu i le potu sa nofo taofia ai.
E lē o faailoaina e le Sui Komesina pe sa iai ma nisi taofia sa faamautū i le potu sa nofo ai ma lē ua maliu.
Ua faaalia i se lipoti o loo masalomia o ni manu’a na faatupu e lē ua maliu poo self-inflicted wounds na māfua ai le fano o le soifua peita’i e faato’ā manino lea tulaga pe a mae’a su’esu’ega o loo faia.
O le aso 20 o le masina fou o Fepuari o loo faatulaga e le Faamasinoga Maualuga e lau ai sana faai’uga e iloa ai le faamaonia ma le lē faamaonia o le moliaga fasioti tagata faamoemoeina, moliaga o le fasioti tagata pa’ivalea, umia o se ‘au’upega mata’utia ma le faaoomanu’a tugā sa molia ai Papalii Sia Figiel.
O le aso 28 o Me o le tausaga e 2024 na taofia ai e leoleo lē ua maliu ma molia i moliaga matuiā e pei ona faailoa atu ona o le maliu o le tama’ita’i polofesa o Caroline Sinavaiaana Gabbard o se tagatānuu o Amerika Samoa.
