O le toe amatalia o galuega a le faamasinoga i lenei tausaga lea ua faatulaga mo le faaiuga o lenei masina o Ianuari 2024, o le a aumai ai i le masina fou o Fepuari se faasalaga mo le susuga Pu’eleo Sefulua Peseta, sa galue i le ofisa o le tiute ae ua faamaonia lona moliaga o lona faaulufale i le atunuu o nakoti o le pauta faasāina o le aisa poo le methamphetamine.
O Tesema o le tausaga na tea nei na faatulaga e lau ai se faasalaga i le faamasinoga faaitumalo peitai e iai vaega o le finauga poo le folasaga a le loia a Pu’eleo o loo manao le faamasino e tali iai loia a leoleo, aemaise o le finauga a le loia a lē ua molia e fetaui se faasalaga tupe ae lē o se faasalaga faafalepuipui.
O aiaiga o le tulafono o le ofisa o le tiute i le faaulufale mai i Samoa o ni nakoti o loo molia ai Pu’eleo ae lē o aiaiga o le tulafono o nakoti lea e suesueina ai ni solitulafono o le faaulufale mai o pauta ma fualaau faasāina i le faamasinoga maualuga.
O le masina o Tesema o le tausaga 2020 na molia ai lē ua tuuaia a o galue i le Ofisa o Tiute i le solitulafono sa ia teena ae ua faamaonia ina ua mae’a suesueina molimau a leoleo.
