Ua mae’a nei ona tuuina atu folasaga i finauga faaletulafono a loia o itu auai o le mataupu tau faamasinoga e faasino i talosaga a le afioaga o Leauvaa ua taoto nei i le faamasinoga sili poo le Faamasinoga Maualuga a le atunuu.
O le Aso Tofi na faatoa suesueina ai talosaga mo se poloaiga a le faamasinoga e taofia tumau ai le galuega o tuaoi o eleele o le nuu o Afega, ma le talosaga i le faia o se iloiloga faaletulafono poo se judiciary review e faasino i eleele o loo finau ai, lea ua mae’a faia iai faaiuga a le Faamasinoga o Fanua ma Suafa lea ua silia i le 60 tausaga talu ai.
O le suesueina o ia talosaga na faailoa ai e le loia a le itu talosaga, e iai le faaiuga a le faamasinoga toe iloilo poo le faamasinoga apili a le faamasinoga o fanua ma suafa na soloia ai se vaega o le iuga a le faamasinoga maualalo a lea faamasinoga i le tausaga e 2013, na poloaina ai le faatulai ese o aiga e 18 o le nuu o Leauvaa.
Peitai o le tausaga na tea nei na toe faia ai se isi faaiuga o se poloaiga mai le faamasinoga o suesuega muamua a le Faamasinoga o Fanua ma Suafa na faatulai ese ai nisi o aiga lea na ave se talosaga apili ae lei talia i se faaiuga a le Sui peresetene.
O le loia mo le afioaga o Afega sa ia tuuina atu i lana folasaga mau e faavae ai le teena o ia talosaga ona ua autausagā o taoto faaiuga e faasino i eleele o loo tulai mai ai le feteenaiga, aemaise ua toe laga lagona ona ua faatino le malosi o faaiuga ua mae’a e pei ona iai le galuega o le fuaina o tuaoi o fanua o le nuu o Afega.
O le vaiaso asau o le a aumai ai se faaiuga a le Faamasino Sili le afioga Satiu Simativa Perese i ia finauga.
