A o lē mautonu le faitau selau o avanoa faigaluega i iunivesite i totonu o Niu Sila, ua maua i lipoti e iai le fesoasoani a le malo o loo faatali.
O le asō sa faatalitalia e faailoa mai ai e le malo lana fesoasoani tupe se’i toe faatulai mai ai iunivesite a o pa’ū maualalo ai le fuainumera o fanau aoga ulufale.
E le gata i fanau aoga mai atunuu mamao, ae i faamaumauga o loo faapea foi le pa’ū o le fuainumera o fanau aoga i totonu lava o le atunuu ma e le faigofie ai i pulega o iunivesite ma sau ai le faaiuga o loo vaavaai e vāea le faitau selau o tagata galulue.
O se mataupu na faatalosagaina ai e le toatele le malo se’i fesoasoani ane i galuega a le toatele o le a le toe maua.
O le tala a le Newshub o loo ta’ua ai, o le fesoasoani tupe sa tālia i le asō o le a maua mai i fetuunaiga o isi poloketi ma o le a faasafua mo le lua tausaga a o toe tau faatulai mai iunivesite i totonu o Niu Sila.
