O le mae’a ai o le fonotaga lona lima o le Atoa o Samoa lea sa talimalo ai le faigamalo a Amerika Samoa i le vaiaso ua mavae, ua faailoa ai i lipoti mai le fale televise o le KVZKTV i le teritori, le talanoaina i le fonotaga ua mae’a, o le fuafuaga i se atina’e o manu palalagi mo Amerika Samoa e pei ona sa agiga i se masina e lei mamao atu, le 400 eka o fanua i Togitogiga e faatino ai lea fuafuaga.
Ua lipotia e lea fale televise se finagalo o le taitai o le Malo o Samoa sa folasia i le fonotaga e faatatau i le mataupu, lea sa fautuaina ai e le tamaitai Palemia le tatau ona tāpā se finagalo o le vaega tuma’oti o pisinisi le private sector, ma e tatau foi ona faatalanoa muamua e le Kapeneta.
O le faafoeina o sea ituaiga o atina’e e manatu le Palemia ua lē o se matafaioi a se Malo ae o le pitolaau e faagaioi e le vaega tuma’oti i pisinisi.
I le tapunia o le fono lona lima o le Atoa o Samoa, o le Palemia o le Malo Tutoatasi o Samoa ma le Kovana Sili o le faigamalo a Tutuila ma Manu’a na sausaunoa i le tāua o sootaga o Malo ma tagata uma o Samoa, i le unaia o atina’e ma taumafaiga eseese mo le manuia o tamaoaiga o faigamalo e lua.
O ni vaega o saunoaga a taitai o Faigamalo e lua a Samoa i le mae’a o le fono lona lima o le Atoa o Samoa, e ala i le tautua a le faletelevise o le KVZKTV.
O le saunoaga mai le Kovana Sili, Afioga Lemanu Peleti Palepoi Sialega Mauga, ma le tamaitai Palemia o Samoa, Afioga Fiame Dr Naomi Mataafa.
