E 4 aso o le fono faaletausaga a komisi o galuega a tagata faigaluega a le malo mo atunuu e 16 o le Pasefika o loo usuia i le vaiaso nei i lo tatou atunuu lea o loo talimalo ai le Komisi o galuega a le Malo o Samoa.
O le Minisita o le komisi o galuega a le tatou malo le afioga i le tamaitai Palemia, afioga Fiame Dr Naomi Mataafa sa ia tatalaina aloa’ia lea fonotaga o loo usuia i le faletalimalo o le Taumeasina Island Resort.
O le tausaga na te’a nei na faato’ā usuia ai lea fono ina ua tuana’i le tolu tausaga ona o le tapunia o tuaoi o atunuu i faigamalaga ona o le faama’i Koviti-19.
E silia i le 70 ofisa sinia ma usugafono mai komisi o galuega a atunuu e 16 o le Pasefika o loo iai i Samoa mo lea faatasiga.
O atunuu ia e aofia ai le Atu Kuki, Fiti, Kilipati, le Atu Malesala, FSM poo le Federated States of Micronesia, Nauru, Niu Kaletonia, Niue, Palau, Papua Niu Kini, Solomona, Tokelau, Tonga, Tuvalu, Vanuatu ma Samoa.
