O loo i Samoa i le vaiaso nei se aumalaga o sui o le matagaluega o leoleo a le Malo o Niu Sila o loo feiloai ai ma sui o le matagaluega o leoleo, falepuipui ma le ola fuataina i Samoa, ma o loo talanoa ai i galuega o le puipuigamalu ma le puipuiga o le saogalemu o le fono a ta’ita’i o Malo o le Taupulega o le a usuia i Samoa i le masina o Oketopa o le tausaga nei.
Ua faailoa e le matagaluega o leoleo, falepuipui ma le toe fuataina i se faasalalauga i lana upega tafailagi, o loo asia e le aumalaga nofoaga uma o le a faagasolo ai le fonotaga faapea nofoaga o le a faamautu ma nonofo ai usugafono.
O lo latou tomai a’oa’oina i le faia o sailiiliga ma suesuega ina ia saogalemu ma malu nofoaga uma, o se tasi o faamuamua o loo galulue faatasi iai leoleo a Niu Sila ma leoleo i Samoa.
O auala o feoa’iga i taimi o le fono o se isi lea vaega tāua o loo silasila iai tapenaga mo le puipuiga o le saogalemu a o tauaofia lea fono faavaomalo i Samoa.
