I le silia ai nei ma le 60 tausaga talu ona faatuina le Kolisi o Sanele i Moamoa, ua faailoa e le pulega o le Ekalesia Katoliko o le puleaga a Samoa Apia i se tusi faalauaitele, faaletonu ua feagai nei ma lea kolisi a le ekalesia e tauau ai ina tapunia ma lē toe faagaioia.

O ia faaletonu e aofia ai le palasi o le numera o fanau e lesitala ma aooga ai, faaletonu falea’oga ma ua manaomia le toe faaleleia, ma le itu faigata e sili ona tāua o tupe ua lē fea’ua’uta’i le faasoa.

I le tau sailia o se lavea’i mo ia tulaga faigata ua faatuina ai nei se komiti faatonu ua ta’ua o le Emergency Board e faia sailiga seleni ma ua ave ai le faatalauula i tama ma teine tuai uma sa aooga i le kolisi o Sanele, faapea uo ma paaga ma aumea mamae a le kolisi i soo se tulimanu o le lalolagi, e manaomia le latou fesoasoani.

O le aso 25 o le masina na te’a nei o Aperila na tuuina atu ai i se tulaga faalauaitele se tusi mai le faauluuluga o le Puleaga a Samoa Apia ua iai ma le ioega a le taitaifono ma le komiti faatonu ua talosagaina ai se fesoasoani i tulaga faigata ua feagai ma lea kolisi a le Ekalesia Katoliko, o se tasi o kolisi a lea ekalesia sa faafailele ma fofoa ai le olaga a’oa’oina o nisi o ta’ita’i o le tatou Malo, faapea faalapotopotoga ma le vaega o pisinisi tuma’oti.