Fai mai i se tasi o taulaga i Tairawhiti ua faataga ai e se tasi o faleoloa le faia o aitalafu a tagata a o talitali ai se taimi e toe ola atu ai pe toe faaaauau ai le auaunaga i masini talatupe ua faaleagaina talu le afā.
O le faleoloa Te Puia General Store i le itu i Matu o Koromaru Bay o loo motusia mai ai pea le eletise i le taimi nei ma o loo faaaoga le afi faaleoleo a le pisinisi mo moli ma tatala ai faitotoa o le faleoloa i lana auaunaga masani i tagata i lea faaitu ae leai lava ma se tupe ua mauaina talu mai le mae’a o le afā.
O le mafuaaga ona ua le ola masini eftpos ma ua leiloa pe faapefea ona totogi faatau.
Fai mai le pule o le faleoloa o le taimi nei ua faataga ona aitalafu faatau ma ua lata i le 8 afe le tau aofai o faatau a tagata e lei totogia.
E manatu nisi o lea faaitu o se faaiuga agalelei ua faia e lea auaunaga aemaise i se taimi o loo matuā manaomia ai le fesoaoani e tagata uma ona o aafiaga o le afā, fai mai se tasi o loo mataituina lenei faiga, pau a le itu e tulituliloa talosia ia taui le alofa i le alofa ae le o le uma ane foi ae sosola e le totogia aitalafu.
