O le faatinoina o tiute faaleoleo i le vaaia o le puipuiga o le saogalemu ma faamalosia le tulafono a o talimalo Samoa i taaloga a le Pasefika i le tausaga e 2019, ua faasoa atu ai ia tomai e leoleo e toatolu mai lo tatou atunuu i leoleo o le atunuu o Solomona, o le a talimalo i taaloga a le Pasefika ia Novema o le tausaga nei.
Ua faailoa i fesootaiga i upega tafailagi a le matagaluega o leoleo i Solomona, e tāua le faasoa a Malu o le Malo mai Samoa ua fesoasoani i le latou tapenaga, mo le vaaia o le saogalemu aemaise o le puipuiga pe a faagasolo taaloga a le Pasefika i lo latou atunuu.
E toatolu malu o le Malo mai lo tatou atunuu sa malaga mo lea faamoemoe e aofia ai ni tamaitai se toalua ma se alii o ni leoleo sinia.
Mo le silafia o le tasi lea o atunuu sa umi ni tausaga o galulue ai leoleo mai Samoa ma isi atunuu o le Pasefika mo le leoina o le filemu ina ua aafia le lotoifale o upufai o Solomona i vesiga i le va o tagata o lea atunuu.
