Ua faamatala e se tasi tina i le aufaasalalau lona popolega ma lapatai mai foi i isi mātua e faatatau i se isi ituaiga faiga taufaavalea ua alia’e i upega tafailagi e faaautu sa’o lava i tama talavou.
Fai mai le faamatalaga a le tina e pei ona lipotia, e 16 tausaga o lana tama tama na faaautu mai iai osofaiga a nisi o le au taufaavalea mai Nigeria na o latou faafefe ane le tamaititi o le a faasoa faalauaitele nisi o ona ata agai i ana uo ma aiga pe afai e lē tuuina atu se tupe e 700 tala.
Ta’ua e le tina e lē o fia faailoaina lona igoa sa maua ane se friend request a lana tama mai se isi tagata i luga o le Snapchat ma iu ai ina oo talanoaga i luga o le app lea i mataupu tau feusuaiga, ma o le mau a le tina ua tele taimi ua fautua ai i lana tama i le lafoina o ata i luga o upega tafailagi faapea, ae mulimuli ane ina ua faatalanoa le tamaitiiti na ia ta’utino ai o loo faafefe ane o ia e tagata ia tuu atu le vaegatupe lea, a leai o le a faasoa faalauaitele ona ata sa lafo atu i luga o lea itulau.
Ua faailoa se faamatalaga mai le Komesina o le Australian Federal Police e ao ona silafia o le toatele o i latou ua aafia i mataupu faapea e silia ma le 90 pasene o i latou o le itupa o alii e i le va o le 13-17 tausaga le matutua, ma o se tulaga e ao foi ona faamanatu ai i mātua ia silasila toto’a foi i ni tulaga faapea o loo ono aafia ai le fanau.
Puna o Faamatalaga: https://9now.nine.com.au/a-current-affair/sextortion-scam-nigeria-afp-australian-teenage-boys/74c22ed8-674a-451f-bb59-3cf2369d0cdc
