O le lua aso ua mavae sa fetufaa’i ai le taitai o le Malo o Fiti le afioga i le Palemia o Sitiveni Rambuka ma le Minisita o Faalapotopotoga Tuma’oti a le Malo o Samoa le tofa Leatinuu Wayne Sooialo ma lana aumalaga, i auala e mafai ona galulue faatasi ai Malo e lua e faaleleia auaunaga ma tautua a faalapotopotoga temenoi a le Malo poo State Owned Enterprises.
O le Palemia o Fiti o le Minisita lea o faalapotopotoga tuma’oti e 13 a lea malo tuaoi.
I se faasalalauga i upega tafailagi a le Malo o Fiti o loo faailoa ai lea feiloaiga i le vaiaso nei, lea sa tufa atu foi iai le Minisita o Faalapotopotoga Tuma’oti a le Malo o Samoa i auala o loo fia maua atili iai se silafia i le faagaioia o faalapotopotoga tuma’oti a lea Malo, ina ia fesoasoani ai i lana pitolaau mo le faaleleia o a tatou foi faalapotopotoga tuma’oti o loo i le vaaiga a le Malo.
O se vaiaso e lei mamao atu sa afea ai foi Niu Sila e le tofa Leatinuu ma lana aumalaga i le faamoemoe lava lea e tasi, o le saili faalumaga mo ni fautuaga ma ni metotia e faaleleia ai le tautua a faalapotopotoga tuma’oti a le Malo o Samoa.
