O le aofai o meapueata e pueina ai le saosaoa o taavale o le a faaopoopo i le atunuu atoa a o faasee ane le ofisa o felauaiga a Niu Sila le NZ Transport Waka Kotahi poo le NZTA e faaauau le faatinoina o le auaunaga lea mai leoleo.
O le faamatalaga lea mai le NZTA i le vaiaso nei na saunoa ai le faatonu o Emma Speight i le taimi nei e i lalo ifo o le 200 le aofai o meapueata ia i luga o alatetele ae o loo silasila nei le ofisa i se aofaiga pe 800 o ia meapueata.
Fai mai le NZTA o meapueata ia o le a faaigoa o safety cameras, meapueata mo le saogalemu ia faasee ese ai le manatu o nisi o ia meapueata e mo le sueina o tupe a le ofisa.
O le tuuina aloaia atu o le auaunaga lea mai leoleo i le NZTA ua ta’ua e se tasi o sooupu a le ofisa masalo o le a faatoa faataunuu poo le ogatotonu o le tausaga fou.
