O le galuega faaauau a le ofisa o le komisi o faigapalota e pei ona toe lesitala uma ai tagata palota o itumalo faapalota e 51, o le ogatotonu o lenei vaiaso i le Aso Lulu e oo i le Aso Faraile o le a faatino ai le lesitala o tagata palota i nofoaga e pei o le maota gasese o Tupua Tamasese Meaole i Motootua, o le maketi i Fugalei, maketi i Vaitele, ma le uafu i Mulifanua.

Ua faailoa e le ofisa o le komisi o faigapalota i lana upega tafa’ilagi, o lea galuega e amata i le 9 i le taeao ae mae’a i le 4 i le afiafi ma e tatau ona tauaao atu se pepa faamaonia poo se ID e pei o se Tusifolau, laisene ave taavale, se ID o le NPF, poo pepa faamaonia o loo a’oga, se student ID poo se pepa faamaonia o loo faigaluega.

E pei ona silafia o tapenaga a lea ofisa mo le isi palota tele a le atunuu i le masina o Aperila o le tausaga e 2026 ua toe faia ai lesitala mo ē ua aulia le 21 tausaga o le matua o le soifua, o ē ua agavaa e fia sui le itumalo e palota ai, ma tagata palota ua umia suafa matai.

O loo avanoa ai foi tagata e silia i le tasi le suafa matai ona lesitala i se isi itumalo o loo umia ai se isi suafa matai i le ausia lea o agavaa o loo aiaia i le tulafono o faigapalota.

Ua faailoa e le ofisa o le komisi o faigapalota o le mae’a o le galuega sa faasavali i itumalo o le atunuu ua faamauina ai se aofaiga e tusa ma le 37,880 tagata palota ua lesitala.

O loo iai le fuafuaga e tatau ona maua se aofa’iga pe tusa ma le 117,200 o tagata palota e lesitala mo le faigapalota tele o le 2026.