O le taeao o le Aso Lua i le itula e 11 taimi Peretania e faagata ai le tuuina atu o le avanoa i le susuga i le Kapeteni a le Toa Samoa, Junior Paulo e apili ai le faaiuga ua faasala ai o ia ona o le tuu i luga o lona lima (forearm) a’o tamoe sa’o lava i le tama liki a Tonga ia David Fifita. 

O le faaiuga lea a le komiti suesue (judiciary) a le NRL o loo iloiloina vaega eseese e faatatau i le taaloga ma e tasi le taaloga a le Toa Samoa o le a lē mafai ona taalo ai le alii o Junior Paulo.  

I lea taaloga ma Tonga lea na manumalo ai le Toa Samoa i ‘ai e 20-18 ae e le gata ua faamalolo le tumau le alii o Paulo ae sa iloilo foi se gaioiga o loo tuuaia ai le alii o Joseph Suaalii lea e faapea sa ia faaaogaina lona tulivae e tali ai le pu’e mai se tasi foi o sui o le ‘au a Tonga. 

Mo Sualii na ave iai le lapataiga a le Komiti peitai o le alii Kapeteni o loo tālia nei le tulaga o le apili ai o le faaiuga pe faatumauina pe o le a suia mafaufau o le komiti ma mafai ai ona taalo i le taaloga o loo loma nei ma Egelani i le Semi Finals. 

O se faaiuga ua faaalia ai manatu eseese o le ‘au tapuai a le Toa Samoa e faapea ua faailogalanu foi faaiuga ma o loo naunau lava ‘au tetele nei e fai se gaioiga e le mafai ai ona taaalo nei alo o le atunuu.