Tusia: Maina Vai
O le vaiaso nei na tatala ai e le Minisita o Pisinisi, Alamanuia ma Leipa ia Leatinu’u Wayne Sooialo le faasafuaina atu o le $10miliona mo Pisinisi Tumaoti faapea ai Faalapotopotoga o Tagata Faigaluega i le atunuu.
E silia i le 6000 pisinsi agavaa o le a maua lea fesoasoani mai le malo, o pisinisi uma na lesitala ae le’i amata le fa’ama’i ma na latou umia Laisene Pisinisi mo le tausaga 2020 ma le 2021 e agava’a i le Fesoasoani.
E tusa ma le $1500 le tupe e maua e le pisinisi lesitala a tagata taitoatasi(sole trader) e faapena foi i pisinisi faipaaga(Partnerships). Afai e sili atu ma le 4 laisene pisinisi a ia vaega e lua (Tagata Taitoatasi poo Faiga Paaga) e na’o le fa laisene e maua le fesoasoani. E tusa lea ma le $6000.00 a le Tagata Taitoatasi poo le Fai Paaga foi e tai 4 laisene pisinisi o umia e maua.
O Kamupani e tusa ma le $1800 a le laisene e tasi e maua, ae afai e sili atu i le 5 laisene pisinisi a le Kamupani e tasi e na’o le 5 lava laisene o le a maua le fesoasoani. O lona uiga a faatusa atu e tusa ma le $9000.00 e maua e se kamupani e lima laisene pisinisi o loo umia.
Ua faaalia e silia i le 5000 laisene o pisinisi a tagata to’atasi na resitala i le 2020 ae 77 laisene a faiga Paaga. E silia i le 1000 laisene a kamupani i le 2020, ma o lenei fesoasoani sa tuuina i le tala faatatau o le tupe 2021/2022.
Ua saunia e le Matagaleuag o Pisinisi, Alamanuia ma Leipa se pepa talosaga tusitusia e mafai ona oo atu ma aumai mai le ofisa…faapea foi i luga o upega tafailagi www.mcil.gov.ws e talosaga mai iai latou e agava’a.
Ua fautuaina fo’i pisinisi agavaa ina ia tuuina atu faatasi ma kopi o laisene pisinisi o le tausaga 2020 ma le 2021, o le a iloiloina e le Matagaluega.
Ua taua fo’i o le maea ai o le tasi le masina talu ona maua le fesoasoani, e tatau ona faaoo atu se ripoti i le tulaga na iai le faasoasoaina o le seleni na maua. O le aso lava foi na tatalaina ai le fesoasoani mo Faalapotoptoga o Tagata Faigaluega i totonu o le atunuu lea ua faamatuu iai le $20,000.00.
O le a faaogaina ai Faalapotopotoga o Tagata Faigaluega o loo avea ma sui auai i le Fono Aoao Faatafatolu a Samoa i le taimi nei e aofia ai..
1. Fono Aoao o Tagata Faigaluega i Samoa (Samoa Workers Congress)
2. Fa’alapotopotoga o le Au Tausi Soifua a Samoa
3. Fa’alapotopotoga o Tagata Faigaluega a le Malo
4. Fa’alapotopotoga oTagata Faigaluega i Luga o Va’a
Na faailoa o ia fesoasoani e mo galuega faaofisa ma le faatalanoaina o galuega atinae mo nei ofisa aemaise ai le siitia o lo latou auai e faailoina a latou sini autu i vaega eseese e ala mai ai fesoasoani.
Na faailoa e le alii Minisita e umi se taimi e taumafai ai e toe faafo’i le tamaoaiga o le atunuu i le tulaga lelei sa iai ao le i tupu mai lenei faama’i.
Ma o loo vaavai toto’a foi le malo i aafiaga o loo iai nei o tatou tagata ma pisinisi o lea ua savalia le 2 tausaga o loo vaaia pea le tulaga faigata i ia vega taua mo le atinae o le atunuu.
