O le sisiina a’e o le tagavai o le Malo Amerika ma le Malo o Amerika Samoa e faailoga ai le 124 tausaga o le Sisigafu’a a le teritori i lenei vaiaso, ua faaaogā ai ma fanafanua mai Samoa Tutoatasi.
O ia fanafanua o le a faapāpā a o sisi a’e tagavai o ia malo, ae ua mafai ona faatino i sootaga vavalalata o faigamalo a Samoa ma Amerika Samoa, e pei ona malaga nisi o leoleo sinia mai lo tatou atunuu e faatino le galuega o le faapāpāina o fanafanua e 21.
O le vaiaso ua mavae na tuua ai le atunuu e le aumalaga o malu o le Malo mai le faaili a leoleo mo le auai i sauniga o le Sisiga fu’a a Tutuila ma Manu’a ma faaaogā ai ma fanafanua.
O le faatoa toe malaga lea o le faaili a malu o le Malo i se valaaulia mo aso faailogaina o le fu’a a Amerika Samoa, i le tuanai o ni tausaga e lē o toe malaga.
Ua fai foi si umiumi e lē o toe masii ni aufaafiafia a nuu ma afioaga mai Samoa i se valaaulia o polokalame o le fu’a a le teritori, e pei ona sa masani ona valaaulia foi e le malo o Samoa aufaafiafia a nuu ma afioaga i Sasa’e e faafiafia i aso faailogaina o le tatou tutoatasi.
