O le tamaitai o Moemoana Safa’ato’a Schwenke lea ua faapaleina o le tausaga o Samoa i Niu Sa Uelese ma o le po anapo na faatino ai le sauniga faapitoa e faapaleina ai le tamaitai o Moemoana e pei ona saunoa iai le peresetene o le asosi, Martha Lam Roache.

I se pepa o faamatalaga mai le asosi a le Miss Samoa NSW ua faailoa ai o loo galue nei Moemoana i le Australian Museum ma e iai lona naunautaiga e galue faatasi ma komiuniti Pasefika mo se sootaga i ‘oa ma measina o loo teuina i lea nofoaga.

E tele le tomai o le tamaitai i tu faaleaganuu ma faafiafiaga e pei ona fesoasoani ai foi i le Matavai Pacific Cultural Arts Center, e umia e lona aiga.

Ma sa auai foi i nisi o faamoemoega tetele o le Pasefika e faaalia ai tu ma aganuu ma tausinio foi i le tauvaga ailao afi a le lalolagi ma tulaga lua ai.

O lona faamoemoe ia faamalosia atili talavou e faaaoga taleni.

O Moemoana na faauu mai le Iunivesite o Woolongong ma lona faailoga o le Bachelor of Arts in Indigenous Studies and Environmental Humanities.

E faafetaia foi e le peresetene ma le asosi le sao o le tamaitai sa pale mai i le tausaga talu ai, Valentine Tanya Tago.

O le tamaitai o Moemoana o le alo o Frederic ma le tamaitai o Maryjane Schwenke sa avea foi ma Tausala o Samoa ma le Pasefika i tausaga ua tuanai.