O le tamaitai talavou o Valentine Tanya Tago ua faapaleina e avea ma tausala Samoa o Niu Sa Uelese, poo le latou Miss PacifiCast Samoa NSW 2022-23.
O le afiafi o le Aso Faraile talu ai na faapaleina ai le tamaitai o Valentine ma faaee atu iai faamanuiaga a le komiti ma i latou uma sa auai i lea afiafi, mo lona faasauni atu i le tauvaga autu o le a faatinoina i Apia i le masina fou o Setema e pei ona masani a’i le taimi faatulagaina o lea tauvaga e taualuga i ai le vaiaso o le faamanatuina o le Teuila i tausaga taitasi, e ui o lea ua suia i polokalame faaauau o le faamanatuina o le Tuto’atasi o le atunuu mo lona 60 tausaga.
O le tamaitai lalelei o Valetine Tanya Tago ua 21 ona tausaga. E nofo i le pitonuu o Cabramatta i Sini Niu Sa Uelese, ae o ona afioaga tau tupuaga i Samoa, o Sapapalii i Savaii, Saleapaga i Aleipata, Sataoa i Safata ma Vaigaga i Faleata.
O se talavou mai le ekalesia EFKS Canterbury, ma ua sauni nei le Miss PacifiCast Samoa NSW e malaga atu mo le tauvaga i Samoa, e fai ai o ia ma sui o tagata Samoa uma o loo alala ma papaaao i Niu Sa Uelese e tauva mo le pale o le Lalelei o Samoa, poo le Miss Samoa mo lenei tausaga 2022 e oo i le 2023.
Ma afai ae manuia lona taumafai i lea tauvaga tele i le masina fou ma faapale o le Tausala o Samoa, le Miss Samoa 2022-23, ona faaauau ai lea o lana folauga mo le tauvāina o le pale o le Tausala o motu o le Pasefika poo le Miss Pacific Islands, ua faatulaga e faatino i Marshall Islands pe afai e taunuu pea lea fuafuaga sa faatulaga mai ai talu le tauvaga mulimuli na faia i Papua Niu Kini ia Novema 2019.
O le PacifiCast o le sponsor autū lea mo le tapenaina o lenei faamoemoe e sailia ai se tamaitai talavou mai le setete o NSW e tauva i le sailia o le tausala o Samoa.
O ou māmā na Miss PacifiCast Samoa NSW! Ia manuia lou faamoemoe.
