E to’a 11 tagata ua faamaonia ua maliliu ona o le afā o Gabrielle.
O le taeao ananafi na faamaonia mai ai e leoleo le isi toalua faaopoopo, ma o le tasi e mai Napier a o le isi o Hastings.
Ua fai mai ai foi ma leoleo o loo iai le popolega ua ono maliliu le isi tusa ma le 10 i le 11 o loo tausailia pea nei i le uma ai o le afā.
E oo mai lava foi i le afiafi ananafi i le taimi na saunoa mai ai le Palemia Chris Hipkins, e tusa ma le 3,200 i latou o loo pipii pea igoa i le lisi o tagata e le o mafai lava ona maua se fesootaiga.
A o maualuluga ai pea nei fuainumera, ua faaopoopo le isi 120 leoleo mai isi vaega o le atunuu e auina atu i nofoaga nei o loo faaauau ai pea suesuega ma ua faamaonia e le minisita o leoleo Stuart Nash, afai ae toe moomia nisi leoleo o le a toe faaopoopo foi.
O lea foi ua taunuu mai le aumalaga 27 o tagata fesoasoani mai Ausetalia ma o loo galulue faatasi ma le vaega o tineimu a Niu Sila i le tele o vaega o Hawkes Bay.
O le aso foi ananafi na faamautinoa mai ai e Chris Hipkins ua talia e Niu Sila le ofo a Fiti e auina mai nisi o ona tagata e fesoasoani ia Niu Sila.
