Ua faailoa mai le faaopoopo ai pea o faigāmalaga a le Ea Niu Sila ua lē faataunuuina ma faailoa foi le alu i luga o le tau o pasese talu ai lava tulaga pagātia o loo iai aafiaga o le suāuu i lenei vaitau.
Faamanino e le Ea Niu Sila, o nei suiga o loo aafia ai nisi o faigāmalaga i le masina o Me ma Iuni, ma e aafia ai le 4% o faigāmalaga ma le 1% o tagata femalagaa’i.
Ta’ua e sui o le Ea Niu Sila, ua amata faatino nei a latou galuega taulogologo i tagata femalagaa’i ma o loo iai faamoemoe e faamae’aina i le faai’uga o lenei vaiaso.
I lipoti mai le leitio faavaomalo a Niu Sila, ua faamauina ai le maualuga o le tau ua oo iai le tau o le suāuu o vaalele o jets talu ona amata le taua a Amerika Isaraelu ma Iran.
I faamaumauga, o lea ua oo atu i le $230 tālā Amerika le tau o le suāuu i vaalele o jets a le Atu Asia, faatusa atu lea i le $100 tālā Amerika i le paelo suāuu na iai a o le’i tula’i mai le taua.
Faaalia e le Ea Niu Sila, ua faaluaina le tau o le suāuu ma le penisini ma o lea ua aga’i ai e tuutuu i luga tau o pasese ina ia faapaleni ai tulaga o le taugatā tele o le suāuu ma le penisini.
I tulaga o femalagaa’iga o lea ua faailoa, o le masina o Me ma Iuni, o lea ua tilotilo e oo atu i le 27 suiga pe tusa ma le 4 faigāmalaga i le vaiaso mo auaunaga i Aukilani.
Mo Ueligitone e 30 suiga, pe ā ma le 4 faigāmalaga i le vaiaso, Kalaiesitete, e 10 suiga poo le tasi foi le faigāmalaga i le vaiaso.
O suiga nei o loo faaopoopo atu lea i suiga ua mae’a faatino mai le aso 16 o Mati se’ia oo atu i le aso 3 o Me, e pei ona vaaia ai suiga i auaunaga o Aukilani i le 31, ae o loo faatumauina le lelei o faigāmalaga i le masina lenei o Aperila.
Mo Ueligitone, e 21 suiga poo le 3 lea o faigāmalaga i le vaiaso.
I le tele o suiga ua molimauina o lea ua fautuaina ai e le pulenuu o Nelesoni, poo Nelson ona tagatānuu o loo fuafua e malaga ese mo faigāmālōlōga ina ia taga’i i ni tafaoga faalotoifale local options nai loo le malaga ese atu.
O lona tilotilo i le faaolaola pea o le tamaoaiga o le atunuu ma le itumalo.
Puna o Faamatalaga: https://www.rnz.co.nz/news/business/591652/air-nz-cuts-more-flights-from-schedules-lifts-ticket-prices-amid-fuel-crisis
