Ua ripotia mai le faamaonia o le aafia o le isi to’afa o nisi o le pasese mai Niu Sila na taunuu atu i le atunuu i le Aso 6 o Mati i le siama o le Koviti19 i le maea ai ona faatino o latou suega lona lua i le vaiaso nei.
Ua oo atu ai nei le aofaiga atoa o tagata o loo faanofoesea i Samoa ua aafia i le Koviti19 i le to’a 12.
E pei ona silafia e to’avalu lea na muamua aafia mai lea lava pasese ma o le to’atasi mai le toafa ua aafia nei sa nofo latalata i se tasi o le to’avalu muamua.
O le taimi nei ua auina atu i latou nei e toafa i nofoaga faanofoesea faapitoa i Motootua mo le mataitūina ma faaauau ai pea ona fai a latou suega poo tests.
O loo manuia uma le isi vaega o le pasese faatasi ai ma le to’a 127 o le aufaigaluega ma muaau i le taunuu ai o le vaalele i le Aso Sa na te’a nei ina ua maea a latou suega ananafi.
