Ua oo atu nei le aofai o i latou ua ripotia mai e le Matagaluega o le Soifua Maloloina ua maliliu i le Koviti i le to’a 7 ina ua faaaopoopo le to’a 4 o i latou fou mai le ripoti lata mai o le Koviti i le Aso 8 o Aperila 2022.
O i latou fou nei e to’afā ua maliliu na ripotia mai e le Matagaluega e aofia ai;
1. O se tamā 56 tausaga le matua, e le’i faia sona tui puipui, e ma’i suka toe lē atoatoa lona tino (amputation) mai le 2019 sa fa’ata’otolia ai i lona mo’ega se’ia o’o lava ina pē atoa ai lona tino (stroke);
2. O se tamā 69 tausaga ua mae’a ona tui e tolu o le Koviti – 19, e ma’i suka, ma ua fa’amauina o lo’o a’afia i le fa’ama’i o fatuga’o i lona tulaga fa’ai’u ma o lo’o fa’amauina i le tala fa’asolopito o lona soifua, sa mu lona tino ma ua o’o i le tulaga ogaoga ona a’afiaga ma ua i’u lava ina sosolo le siama i lona toto ma fa’amamā ai lava.
3. O se tamā 59 tausaga ua mae’a lona tui muamua o le Koviti – 19, e toto mauāluga ma ua tau a’afia ai ma lona fatu
4. O se tamā 74 tausaga ua faia lona tui muamua ma e le’o i ai ni fa’amaumauga o ni ona gasegase tumau.
Ua fautuaina ai e le Matagaluega le mamalu o le atunu’u, o fa’amatalaga patino i ‘ai latou nei e to’afa (4) ua māliliu e le’o fa’alauiloaina fa’alaua’itele ma e tāua le malu puipuia ona o le fa’aaloalogia ma le amanaia o aiga o i latou nei.
Ua ripotia foi e le Matagaluega o le Soifua Maloloina le fa’aopoopo ai oi latou fou e to’a 342 ua a’afia i le siama o le Koviti – 19 mai le mamalu o le atunu’u lautele ma le to’atolu fou oi latou na malaga mai fafo ua a’afia fo’i i totonu o lenei 24 itula.
O le aofa’i atoa o e ua a’afia talu ona pepesi i tua le Koviti – 19 i le Aso 17 Mati, 2022 e to’a 3,602 ae lē aofia ai le to’a 63 oi latou sa pesia na malaga mai atunu’u i fafo. E to’a 7 i latou o lo’o taofia i le Maota Gasegase i Moto’otua ma le to’atolu o lo’o i le Potu Tigaina (ICU).
