E 149 gasegase fou o le Koviti-19 ua faailoa e le matagaluega o soifua maloloina i lana lipoti o le aso 30 o Me i le aso muamua o Iuni, ae to’atasi le tagata na maliu ai i totonu o lea 24 itula ma siitia ai i le 27 soifua ua fano i le faama’i talu ona pesia le lautele o le atunuu i le aso 17 o Mati.

Ua faailoa i lea lipoti lata mai le aofa’iga e 13,796 o tagata i le atunuu ua aafia i le siama o le Koviti-19, e aofia ai le to’a selau o pasese mai fafo na maua ia latou su’ega ina ua tulaueleele i Samoa ua aafia foi i le faama’i. E to’a 6 pasese na maua i le siama i le malaga mai Fiti o le aso 28 o Me ma faamauina le selau o tagata malaga mai fafo ua maua i le siama. E to’afitu sa taofia i le falemai mo togafitiga talu mai le aso 30 o Me e pei ona lipotia e le soifua mālōlōina.

O le see mai o puipuiga o le atunuu atoa i le laasaga muamua lea na amata i le Aso Lulu na te’a nei le aso muamua o Iuni o le a faaauau mo le fā vaiaso, ma toe iloilo ai aiaiga o poloaiga mo puipuiga i le aso 28 o le masina nei o Iuni. Ua tatala faasoloatoa le atunuu ma ua faapena foi ona toe tatala ai maketi ma pisinisi i le Aso Sa e pei ona sa masani ai.