Ua faailoa e le Sui Faatonu Sili o le Matagaluega o le Soifua Mālōlōina i Samoa le faaopoopo pea o le numela o tagata i le atunuu e fulisia lava i fanauiti ua maua i āuga o le tale vivini.

Ua faailoa e le Sui Faatonu Sili le afioga Tagaloa Dr Robert Thompsen i le leitio a Niu Sila, e 127 le numela ua oo iai le aofa’iga o tagata ua maua i le faama’i, lea o loo faatali le faai’uga o su’ega poo test mo tagata e 113, ae o le 14 ua faamaonia.

O le faai’uga o le vaiaso nei o loo faamoemoe e tatau ona iloa ai le tulaga ua iai le pipisi o le tale vivini e pei ona faailoa ai e le Sui Faatonu Sili i lea lipoti.

Ae i le numela ua iai tagata ua maua i le tale vivini o le 42 pasene o fanauiti e i lalo o le tausaga le matutua, ae o le 8 pasene o tamaiti e i le va o le masina ma le lua masina le matutua.

O loo maualuga le pasene o fanau ua mae’a tuipuipui e 95 pasene ma o fanau ia e i le va o le 16 vaiaso ma le 15 masina le matutua.

O le faai’uga o le vaiaso nei e tatau ona maua ai le faai’uga o su’ega poo test o loo faia i Niu Sila ona iloa ai lea o se isi faaopoopoga o tagata ua aafia i le gasegase o le tale vivini i lo tatou atunuu.

O le lipoti lata mai a le soifua mālōlōina ua faailoa ai ia latou faamaumauga o le 99 pasene o tagata ua aafia e mai le motu o Upolu, ae tasi le tagata ua maua i le motu o Savaii.

O le 47 pasene o gasegase o le tale vivini o tamaitai ae o le 53 pasene o alii.

O le aso 28 o Novema na faamaonia ai le pipisi o lea faama’i i Samoa.