E tulaga ese se faalavelave ua lipotia i le asō i Ausetalia nei. O se tina e 35 tausaga ua feta’uaina mai ua ia tatui tulou lana fanau i luga o le motorway i le itu i Matu o Adelaide.  

Fai mai le 7news o le tina lea ua pu’eina e leoleo ae na feta’uaina na ia faaoolima i si ana fanau e 3 ma le 8 tausaga le matutua. Poo le ‘afa o le 11 i le po anapo na valaau ane ai leoleo mo se fesoasoani i le motorway i Wingfield i Adelaide ona o lipoti o loo taofi e se tagata o le atunuu lea tina o loo iai se auupega. 

O le faamatalaga e faapea na faatū lana taavale i luga o le motorway, aveese mai lana fanau e to’alua 3 ma le 8 tausaga mai le taavale ma faaoolima loa i nai tamaiti faaaogā ai se naifi tulou.  

O se tagata na aga’i ane i lana taavale sa ia vaaia lea tulaga ma aga’i ane loa ma aveese le auupega mai le tina e pei ona faamatala i le pepa o faamatalaga tusitusia mai leoleo. Na fesoasoani atu iai ma isi o le atunuu na uia lea auala i lea taimi ma taofi ai loa le tina seia taunuu atu leoleo. 

Faailoa i le lipoti na ave tamaiti e to’alua i le falema’i ma togafitia ai e fai si tigaina o o la manu’aga. Na ave e leoleo le tina i le Royal Adelaide Hospital lea o loo taofia ai nei ae fai mai leoleo e ono molia i moliaga e lua o le taumafai e fasioti. O loo sailia e leoleo le mafuaaga o lenei faalavelave.