Ua tau fai solo ane faamaisega ma alofaaga mo si tina mai Perth ma si ana tama teine lea ua maliliu ina ua tafana e le tagata e 63 tausaga i lo la fale i Perth lava.

O tala mai le 9News ua ta’ua ai o le tina lea o Jennifer ma si ana tama teine o Gretel e 18 tausaga le matua o ni tagata agalelei e pei ona molimau ai se tasi o tuaoi.

Ua ta’ua i le lipoti o le tagata o loo tuua’ia e talitonu leoleo o Mark Bombara sa agai e saili lana paaga sa iai a o lei tupu le faalavelave lea i le Aso Faraile talu ai.

O loo ta’ua i le lipoti na faaaogā e le tina ua maliu le $5 afe e faatau ai se masini defibrilator e faapipii i fafo ane o lona fale mo tagata e faaaogā i se taimi e manaomia vave ai se fesoasoani ma sa ia faia foi se kulupu online a le komiuniti e fesootai ai.

Fai mai leoleo o lē o loo tuua’ia na te umia se fana ua laisene ma sa agai ane ma ni fana i le fale o si aiga lea ina ua alu ane e sue iai lē sa fai ma ona toalua.

Fai mai leoleo o si tina ua maliu e uo ma le toalua lea na sue o Bombara ma o loo faaauau i le asō le suesuega.

Puna o Faamatalaga: https://www.9news.com.au/national/wa-news-floreat-shooting-tributes-to-jennifer-and-gretyl–petelczyc/ffb74d76-2356-4c49-9a89-104ba02f6ca0