O lea ua toe faaolatia i fanua le lato i le ea ma le opea ai i le ala o le taitai o le Malo le afioga i le tamaitai Palemia, e pei ona sa toesea mo fonotaga faavaomalo, ma taliu ane i Aotearoa ma feagai ai ma togafitiga faafomai mo ni vaiaso, a o lumanai le Kerisimasi o lenei tausaga.
Ua silia ma le masina o toesea le afioga Fiame Naomi Mata’afa ae o le Aso Lulu o le vaiaso nei ina ua mae’a le Kerisimasi i le Aso Gafua na toe taunuu manuia ai i fanua lana faigamalaga.
O le afioga i le taitai o le Malo o le a saunoa i le saunoaga faamanuia e faafeiloai ai le Tausaga Fou 2024, lea o le a taualuga i le faaaliga o mea faapapa poo fireworks display e faia i le taulaga i Apia ma Faga i Savaii i le po o le vaeluaga o le Aso Sa o lumanai nei le toe aso o lenei tausaga 2023.
