Ua faatino e le Malo faamanuiaga tau tupe e maua i masina taitasi mo tagata o le atunuu e iai manaoga faapitoa poo manaoga tumau o le tino ma le mafaufau.

O lea foi ua faailoa e le Malo se fuafuaga e faavae ai se faaputuga tupe mo faamanuiaga o tagata e iai manaoga faapitoa, e pei ona faaofi i le Palemene se tulafono o le a teuteu ai le tulafono autu o le faalapotopotoga o faaputuga tupe o le Lumanai manuia o tagata le NPF, e avanoa ai ona faatino lea fuafuaga.

O se tasi lea o tulafono taufaaofi ua taoto nei i tauaofiaga a le Palemene ua toe usuia i lenei vaiaso, ma o se taimi ona faapupula lea e le tamaitai Minisita o Tupe le atoaga o lea fuafuaga a le Malo.

I taualumaga lava a le fono aoao faitulafono, o loo tagofia nei i se tulaga faanatinati teuteuga o le tulafono o taavale afi, tulafono o leoleo, tulafono o le aoina o sala ma le faataotoina o faiga faavae, ina ia toe faafoi ai i le Pulega o Felauaiga i luga o le Laueleele, le laiseneina o taavale, ma le faia o faiga faavae mo feoaiga a taavale i luga o ala tetele.

E pei ona silafia o le see atu o le faigamalo fou na faatino ai lea suiga, ma aveesea mai ai i le matagaluega o leoleo le pasia ma le laiseneina o taavale ma le faia o laisene ave taavale.

Le afioga i le Minisita o le matagaluega o leoleo, falepuipui ma le ola toe fuataina afioga Faualo Harry Jeffrey Schuster i le faamalamalamaina o teuteuga i totonu o le Palemene.