Ua vave ona toe sui le faaiuga anapo ma faaleaoga le tetee a avepasi a le NZ Bus, poo le tetee na oo ai lava i le faaiuga o le a taofia uma ai auaunaga a pasi ma avepasi a le kamupani pasi i Aukilani.
O le itula e 2 i le vaveao analeila na tuu e amata taofia lē tumau ai mo le vaiaso atoa galuega a avepasi a le NZ Bus a o toe feutagai le kamupani pasi ma iuni.
O se faaiuga na oo iai i le mae’a fai mai o le iuni o le a galulue pea avepasi i le long weekend o loo iai nei e aunoa ma le ola o masini ua ta’ua o card reader, poo se tala faigofie o lona uiga e feoai fua pasese.
E lei faigofie i le kamupani pasi ona e le saogalemu ona o lea o le a lē mafai ai ona iloa auala o loo uia e pasi faapea ai ma fale faatali pasi o loo tutū ai.
E le gata i lea ae ua soli ai foi ma le konekarate i le va o le kamupani pasi ma le Auckland Transport.
Ana taunuu nei foi le tetee, e le gata o le a lē faigofie mo fanau aoga ma le toe a’e i le vaiaso fou ae faapea foi avepasi e tusa ma le 700 le aofai o le a leai ni totogi e maua.
O se tala fiafia le toe sau o le faaiuga anapo ua sui le mafaufau o sui o le iuni ma o lea ua tuu ese ai tetee.
E toe faaauau talanoaga i le va o iuni ma le kamupani pasi i le vaiaso fou, ae mo feoaiga a pasi a le NZ Bus i Aukilani o lea ua toe foi i taimi masani i le asō.
