Ua aumai faalauaitele se finagalo o le pulega o le faalapotopotoga o taaloga a Samoa le SASNOC e faamanino ai lona tulaga ma ana matafaioi tauave faaletulafono, ina ua mae’a faia lana faaiuga e faamuta mo se taimi lē tumau le toe avea ma sui o le faalapotopotoga le asosi o le taaloga Triathlon.
O le asosi lea e faatinoina taaloga e tolu e pei o le tuuga uila vilivae, taufetuli, ma le aau i le sami.
O le faamuta lē tumau o le toe avea o lea asosi ma sui o le SASNOC e mafua mai i feteenaiga faalotoifale i totonu o lea asosi.
O le aso 19 o Iulai na tuuina atu ai le tusi i le asosi o le taaloga triathlon na faailoa iai le faaiuga ma le aiaiga e tatau ona oo atu i le aso muamua o le masina fou o Setema ua mae’a fofo le feteenaiga.
A oo atu iai e lei maua o le a tauave loa e le SASNOC le vaaia o le asosi.
O se tasi lea o itutino tau taaloga o loo tapena e saili sana ‘au masii mo le igoa o Samoa i taaloga a le Pasefika o le a faia i Solomona i le masina o Novema.
