O le vaeluaga o le po o le Aso Lua o lenei vaiaso na faamuta aloa’ia ai le poloa’iga o faalavelave faafuase’i matuiā na amata faamamalu i le aso 31 o Mati, e mafua mai i le faaletonu tau eletise na aafia ai le motu o Upolu.
Talu mai le masina atoa o lea poloa’iga ua mae’a faataoto e le komiti o faalavelave faafuase’i matuiā faamamā avega ua ofoina mo pisinisi ma aiga na faaleagaina meatotino e ola i le eletise ona o faaletonu sa tula’i mai.
O le taimi nei ua lē toe faasoasoaina le eletise ina ua amata faaaogā afi suāuu e lima, e maua ai le eletise o loo lisi mai se kamupani i Niu Sila, a o faatali afi eletise fou lapopo’a e lua e taunuu i le masina o Aokuso.
E sefulu talosaga mai pisinisi ma aiga ta’ito’atasi ua tauaao nei e le komiti faufautua o faalavelave faafuase’i matuiā mo le iloiloina, ma faia iai ni faai’uga.
O talosaga ia i meatotino sa aafia i le motusia faafuase’i o le eletise i le motu o Upolu.
