O le fonotaga faavaomalo a le Komisi a Malo Aufaatasi o loo usuia i le vaiaso nei i le aai o Niu Ioka i Amerika o loo auai se usugafono a Samoa ua aofia ai ma sui mai le faalapotopotoga o le Nuanua o le Alofa o loo galulue i polokalame mo le atina’e manuia o tagata e iai mana’oga tumau i lo tatou atunuu.
O se usugafono e pei ona faailoa e lea faalapotopotoga o loo iai lo latou naunauta’iga ia toe silasila ai usugafono i le maliega na fausia i Saina le Beijing Declaration lea o loo una’ia ai le tāua o le aofia o tamaitai e iai mana’oga tumau i fuafuaga o le tamaoaiga.
Faaalia e le Nuanua o le Alofa o se malaga umi pe a fua i le 30 tausaga talu ona faamautū lea maliega faavaomalo ona o loo maopoopo iai lagona ma finagalo o faalapotopotoga eseese o loo finauina le faatāua o le tulaga tutusa o tagata poo le gender equality.
I lea fonotaga i Niu Ioka o loo finauina ai foi e le Nuanua o le Alofa le faatāua o tamaitai e iai mana’oga tumau i talanoaga ma soalaupulega i mataupu o le atina’e o atunuu e lē gata i totonu o soo se faalapotopotoga ae faapea i tulaga faavaomalo.
O faamaumauga ua faailoa e le faalapotopotoga o loo ta’ua ai i Samoa lava ia o le 3 pasene o tamaitai e iai mana’oga tumau o loo faigaluega ma maua totogi, ma ua faamauina ai foi o loo itiiti avanoa o loo maua e tamaitai e iai mana’oga tumau e maua ai ni galuega ma o se isi lea o tulaga ua faamatalaina e le Nuanua o le Alofa o se faiga faailogatagata.
O le Aso Faraile mulimuli o le masina nei o loo taloina ai le fono faaletausaga a le faalapotopotoga e talanoaina ai mataupu i lo latou lotoifale ma faia ai foi le filifiliga o tofi o le latou Komiti Faafoe.
