Ua faailoa e le Minisita o Faatoaga ma Faigafaiva i lana saunoaga tali i le maota fono o le Palemene i le Aso Lulu le faamavae atu o le Ofisa Sili o pulega o lana matagaluega le afioga Tilafono David Hunter, ona o ni fuafuaga tau i lona aiga.
O le tausaga e 2016 na uluai filifilia ai lea tamalii e faauluulu iai le matagaluega o faatoaga ma faigafaiva, ae na toe filifilia i le tausaga e 2019 e faaauau ona avea ma Ofisa Sili o pulega o lea matagaluega a le Malo.
Ua faaopoopo le toe sailia o se isi faauluuluga o lea auaunaga a le Malo, i isi tofiga Ofisa Sili o nisi o matagaluega ma faalapotopotoga tumaoti a le Malo ua toe faasalalau avanoa, e pei o le Faalapotopotoga o Fale a le Malo le Housing Corporation, Ofisa Tausi Mavaega le Public Trust, Nofoaga o Suesuega Faasaienisi, faalapotopotoga o le Esetete Tausi, Faalapotopotoga o le Faaputugatupe o le Lumanai Manuia o tagata le NPF, faauluuluga o le Faletupe o Atina’e, o le pule o le Iunivesite Aoao a Samoa ma le Ofisa Sili o le pulega o malae taalo.
