Ua toe alia’e isi sea faainivesi a Michael Wood, ma o lea ua faamavae ai mai ma ona tofiga faaminisita.
O se faamaoniga lea mai le Palemia Chris Hipkins ma e faapea o isi ana sea o lea o loo i le National Australia Bank ma maketi o fesootaiga.
O Wood o lea sa faamalolo lē tumau i le amataga o le masina ona o le lē vave faailoaina o ana sea o loo teu i le malaevaalele i Aukilani ma o se faamalologa e lei aafia ai isi ona tofiga faaminisita.
O le faaiuga foi e faamalolo lē tumau e tusa ma saunoaga a le Palemia sa faia a o faatali suesuega a le komiti a le Palemene lea e suesueina mataupu faapenei faasaga i sui o le maota.
Sa faaalia ai e Hipkins lona faanoanoa tele ona o lea lava foi sa toe fesili ia Wood i le taimi na faamalolo lē tumau ai, pe iai lava nisi sea e ese mai sea o loo i le malaevaalele i Aukilani e moomia le faailoa ona o le conflict of interest, peitai s tali le minisita e leai.
O sea faaopoopo ua toe maua nei, o faaiuga lea o suesuega a le komiti a le Palemene ma e le gata o ia o le trustee ae o ia o le beneficiary.
E ui o Wood o se minisita galue malosi, ae fai mai le Palemia ua le tatau ona toe minisita.
