O le Aso Lulu, 22 Mati 2023 o le aso faaiu lea o le auaunaga a le tamaitai Pule Sili poo le CEO mo le CPL, le Centre for Pacific Languages, le afioga ia Tuiloma Gayle Lafaiali’i (MEd, BA).
I se pepa o faamatalaga mai le Fono Faatonu a le CPL, o loo ta’ua ai le talia aloaia e le Fono Faatonu o le faamavaega a le afioga ia Tuiloma mai lona tofiga, ma ua faamaonia ai foi e le Fono Faatonu le tofiaina o le susuga ia Mr Ron Viviani, na te tauaveina mo le taimi nei le tofiga o le Pule Sili o le faalapotopotoga, a o faagasolo ai taiala masani mo le sailia o se tasi o le a suitulaga ia Tuiloma, na te tauavea tumau lea tofiga tāua a le faalapotopotoga.
O le afioga Tuiloma na amata ona galue mai ma le Trust ia Setema o le 2018 a o faamautu ai le faalapotopotoga i lona nofoaga i Otara.
Na faaoo le agaga faafetai o le Fono Faatonu ia Tuiloma mo le tele o tausaga na faatino ai lana tautua a o tulai mai e taitaia le CPL i lona maumaua’i e momoli ma faataunuu manulauti o le faataatiaga o galuega a le CPL, ma lona naunau ina ia faamautinoa e faatāua ma faatumauina le a’oa’oina o gagana a le Pasefika i totonu o lenei atunuu, e le gata i le taimi nei, ae mo le tele o nisi augatupulaga o fai mai.
Sa ta’ua e le Fono Faatonu nisi o ausiaga autū na finafinau i ai Tuiloa a o seei mai le tofi, e pei o le suia mai o le nofoaga o le ofisaulu o le CPL e pei ona iai nei i lona nofoaga tumau i Manukau, ma le suia o le igoa mai le Pasifika Education Centre ae ua suia i le Centre for Pacific Languages lea na faatino ia Fepuari o le 2022.
Sa momoli foi le agaga faafetai o le tamaitai Pule Sili i le Fono Faatonu a le CPL mo le avanoa na latou faatuatuaina mai ia te ia e na te tauaveina ai le taitaiga o le faalapotopotoga mo nei tausaga e fā ma le ‘afa sa galue ai, aemaise o le mafana o le mafutaga sa latou galulue soosootau’au ai.
Saunoa Tuiloma, e ui o le a faasee ese mai le tofiga ma le galuega sa pele ia te ia, ae mafanafana lona loto i le iloa ma lona faatuatuaina o lana vaega sa latou galulue faatasi, o le a faapea ona latou faaauau ai pea galuega lelei uma sa latou faatinoina faatasi, aemaise foi sa ia ta’ua, e telē lona talitonuga o le a sili atu foi nisi mea o le a faatino e le susuga Viviani lea o le a see ane e faaauauina le galuega ina ia faatino ai pea le auaunaga sili mo le komiuniti.
O le susuga Ron Viviani lea o le a faaauauina mo le taimi nei le tofiga o le Pule Sili, o ia sa galue o le Taitaifono mo le Fono Faatonu o le CPL, o se tofiga sa amata mai ai ia Iuni o le 2019 ae na muamua atu ia Me o le 2018 na amata ai ona avea ma Trustee i le faalapotopotoga.
O le CPL e le gata ina latou ofoina mai ni vasega e a’oa’oina ai e aunoa ma se totogi gagana a le Pasefika, ae tele foi isi auaunaga faapisinisi e latou te faatautaia, e pei o auaunaga tau faaliliuupu mo gagana eseese e 9, e fai foi a latou a’oa’oga ina ia faaleleia atili le malamalama ma le faaaogaina o tu ma aganuu faa-Pasefika ina ia faaaogā i totonu o falefaigaluega, aemaise lo latou taulamua e toe tapu’e ma faatumau le faaaogāina o gagana a le Pasefika i totonu o Aotearoa.
E iai foi isi poloketi a le CPL o loo galulue ai i le taimi nei atonu ua latalata ina faamae’aina, e aofia ai le fausiaina o se APP i gagana a le Pasefika e fesoasoani e momoli atu ma faamatala ai a latou vasega tau a’oa’oga e faia fua i luga o le initaneti, faapena foi ona tapenaina ni tusi fou se lima e faaaogā faatasi ai le gagana Peretania ma le gagana Tokelau (bilingual books) ma le amatraina o se CPL Lanuages Symposium.
